Məsud Pezeşkianın reytinq cədvəlində Əli Xameneinin Ali Milli Təhlükəsizlik Şurasındakı nümayəndəsi Səid Cəlili və parlament sədri Məhəmməd Bagir Qalibafdan irəlidə olması SEPAH arasında qarşıdurmaya səbəb olub.
AzerTimes xəbər verir ki, bu barədə yerli sosial media kanalları və yerli mənbələrdə iddialar səsləndirilib.
Məlumata görə, İran İslam İnqilabı Keşikçiləri Korpusunun rəhbərliyi SEPAH-ın Şərqi Azərbaycan əyalətindəki “31 Aşura” briqadasını Əli Xameneinin Ali Milli Təhlükəsizlik Şurasındakı nümayəndəsi Səid Cəliliyə dəstək verməməkdə, Pezeşkianı himayə etməkdə günahlandırıb.
Qeyri-rəsmi məlumatlarda Cəlilinin xeyrinə dəstək bəyanatı səsləndirməkdən imtina edən “31 Aşura” briqadasına təzyiq göstərildiyi, SEPAH komandirlərinin iclasının keçirildiyi bildirilib.
Yerli mənbələrin dediyinə görə, İran Təhlükəsizlik və Kəşfiyyat Nazirliyində də (ETTELAAT) oxşar problemlər yaranıb, nazirliyin Şərqi, Qərbi Azərbaycan və Ərdəbil əyalətlərindəki bölmələrinə təzyiqlər göstərilir.
Bunun bir neçə ay əvvəldən başladığı, mərkəzin Azərbaycan əyalətlərindəki qurumlara etimadının azaldığı üçün yerli idarələrin bir sıra səlahiyyətlərinin məhdudlaşdırıldığı deyilir.
İddia olunur ki, iyunun 25-də Təbriz fərmandarlığı SEPAH-ın Baş Komandanlığının təzyiqi nəticəsində Məsud Pezeşkianın iyunun 26-da Təbrizin Bağşimal (Təxti) stadionunda nəzərdə tutulan seçki mitinqinin keçirilməsi üçün verilən icazəni ləğv edib.
Bu, “31 Aşura” briqadasının azərbaycanlı komandirlərinin narazılığına səbəb olub və onlar Təbriz fərmandarlığını mitinqin keçirilməsi icazəsini bərpa etməyə məcbur ediblər.
Bununla yanaşı, son bir neçə ay ərzində Qərbi Azərbaycan, Şərqi Azərbaycan və Ərdəbil əyalətlərində həbs olunan milli fəalların əvvəlkilərdən fərqli olaraq dindirilmək üçün Tehrana aparılmaları Təhlükəsizlik və Kəşfiyyat Nazirliyinin yerli bölmələrə inanmadığı kimi qiymətləndirilir.