Milli Məclisin Mədəniyyət komitəsinin sədri Qənirə Paşayeva qardaş Türkiyənin Hatay vilayətindəki Mustafa Kamal Universitetində VIII Uluslararası Türkcess – Təhsil və Sosial Bilimlər Konqresinin açılışında çıxış edib.
AzerTimes xəbər verir ki, builki mövzusu “XXI yüzildə köç və təhsil” olan konqresdə məruzə ilə çıxış edən Q.Paşayeva türk dünyasını daha sıx birliyə çağırıb.
“Böyük şairimiz belə deyərdi: Bayraqları bayraq edən üstündəki qandır, Torpaq, əgər uğrunda ölən varsa, Vətəndir! Bu vəsilə ilə Ərzuruma gedib, ən yüksək təpədə Nənəxatun məqbərəsini ziyarət edərkən nə düşündüyümüzü bölüşmək istərdim. Nənəxatuna övladının kiçik yaşlı olmasını xatırladarkən, “çocuq anasız böyüyər, amma Vətənsiz böyüyə bilməz” deyib. Bəli, bayrağımızı bayraq, torpağımızı Vətən edən qəhrəmanlarımız olub. Azərbaycan və Türkiyənin azadlığı, ərazi bütövlüyü uğrunda canını qurban etmiş şəhidlərimizin ruhu, sağlamlığını Vətən yolunda itirmiş qazilərimizin qarşısında dərin ehtiramla baş əyirəm. Ayrıca, “Hatay mənim şəxsi məsələmdir” deyən, bu gözəl torpaqları yenidən Türkiyə Cümhuriyyəti sınırları içinə alan Qazi Mustafa Kamal Paşa Atatürkü, silah arkadaşlarını buradan rəhmət və minətdarlıqla anmaq istəyirəm. Ruhları şad olsun!
Mən Hataya daha öncəki səfərlərimdə müxtəlif konqreslərdə, simpozium, festival və digər tədbirlərdə çıxış edərkən, sonda həmişə eyni sözü deyirdim. Deyirdim ki, “İnşallah növbəti belə tədbirləri Şuşada, düşmən işğalından azad edəcəyimiz şəhərlərimizdə keçirək”. Açığı, məndən soruşardılar ki, sayın vəkilim, siz, gerçəkdən buna inanırsızmı? Mən əlbəttə, inanaraq söyləyirdim o sözləri. Ulu Tanrıya çox şükürlər olsun, o gün gəldi, arzular çin oldu, inamlar doğruldu və 2020-ci ildə 44 günlük Vətən müharibəsi ilə Azərbaycan böyük hərbi uğura imza atdı, torpaqlarını azad etdi. Bizlər Hataydakı cameləri, müqəddəs ünvanları ziyarət edərkən həmişə Qarabağ, Şuşa üçün dualar edərdik. Çox şükürlər dualarımız müstəcəb oldu. Bu mənim Qarabağ azad olunduqdan sonra Hataya ilk səfərimdir. Bu gün Sizə Şuşadan, Qarabağdan salam gətirmişəm!” – millət vəkili bildirib.
Sözünə davam edən Komitə sədri deyib:
“Mən burada Axıska kökənli xocalarımızı da görürəm. Onların əzbər bildiyi bir Axıska dördlüyünü sizlərlə bölüşmək istərəm:
Axıska bir gül idi, getdi,
Bir əhli-dil idi, getdi;
Söyləyin Sultan Mahmuda,
İstanbulun kilidi getdi…
Axıskanın da, Krımın da, Qarabağın da, Kərkükün də bir kilid olduğu düşüncəsinə yiyələnməyimiz bizləri daha mütəşəkkil qıldı. Gözünüz aydın, artıq o kilidlərdən birini qaytarmış, əbədi azad etmişik”.
Azərbaycanın qaçqın və məcburi köçkünlərlə bağlı çox ağır illər yaşadığını söyləyən Q.Paşayeva Azərbaycan dövlətinin və xalqının əhalinin hər səkkiz nəfərindən birini təşkil edən – bir milyon qaçqın və məcburi köçkünlərin problemləri ilə uzun illər əsasən təkbaşına məşğul olduğunu bildirib. Son illər Türkiyənin Suriya, İraq, Əfqanıstan, Liviya və başqa ölkələrdən milyonlarla məcburi köçkünə qucaq açdığını deyən Q.Paşayeva bu planda Avropada, ümumən dünyada Türkiyə ilə müqayisə ediləcək dövlət olmadığını vurğulayaraq, bu məsələnin ağırlığının Azərbaycana çox yaxşı məlum olduğunu vurğulayıb: “Mən Avropalı həmkarlarıma dəfələrlə demişəm, Türkiyə bir örnəkdir, dünyada bu qədər fərqli ölkədən milyonlarla məcburi köçkünə uzun illər boyu qucaq açmış, Türkiyənin yarısı qədər dəstək göstərmiş başqa ölkə göstərə bilərsinizmi? – O zaman, zəhmət çəkib Türkiyəyə dəyər verəcək, Türkiyəni anlayacaqsınız.
Mən Türkiyənin milyonlarla köçkünə evsahibliyi etməsini əcdadımızdan miras qalmış ədalət və xeyirxahlıq hissi ilə əlaqələndirirəm”.
Qeyd edək ki, tədbirdə Hatay Böyükşəhər Bələdiyyəsinin başqanı Lütfü Savaş, Hatay Mustafa Kamal Universitetinin rektoru Hasan Kaya, Niğde Ömər Xalisdəmir Universitetinin rektoru Hasan Uslu, Qafqaz Universitetləri Birliyinin başqanı Ramazan Qorxmaz, “Unity Company” şirkətinin direktoru Fikrət Əliyev, eləcə də konqresin təşkilat komitəsinin üzvləri məruzələrlə çıxış edib.
Müxtəlif panellərdə də çıxış edən Q.Paşayeva Azərbaycan nümayəndə heyəti adından konqresin təşkilat komitəsinin üzvlərinə, rəsmi şəxslərə, fəal iştirakçılara Qarabağ motivli xatirə hədiyyələri təqdim edib. Təşkilatçılar tərəfindən də Q.Paşayevaya və Azərbaycan nümayəndə heyətinin üzvlərinə plaket təqdim edilib.
Q.Paşayeva və Azərbaycan nümayəndə heyəti tədbirdə iştirak edən, türk dünyasının fərqli bölgələrəni təmsil edən aydınlarla da görüşüb, onlarla qarşılıqlı maraq doğuran məsələləri müzakirə edib.