Nikol Paşinyan ABŞ-ın yeni seçilmiş prezidenti Donald Trampla telefon danışığı aparıb, yüksək rütbəli məmurlarının, əsasən də təhlükəsizlik işçilərinin demək olar ki, yarısını işdən çıxarıb, sonra isə dərhal Vatikana – Papa Fransisklə görüşə getdi. Ola bilsin ki, bunlar eyni zəncirin müxtəlif həlqələridir, öz gücünü qorumağa hesablanıb, daha dəqiq desək, Paşinyan dünyada baş verən dəyişikliklərə uyğunlaşmağa və hakimiyyətini saxlamaq üçün yeni kənar dəstək tapmağa çalışır.
AzerTimes xəbər verir ki, bu sözləri erməni politoloq Avetis Babacanyan qeyd edib.
O bildirib ki, respublikaçı namizəd Donald Tramp və Demokratlar Partiyasının namizədi Kamala Harris arasındakı mübarizə təkcə iki partiya və fərqli ideologiyaya malik iki qüvvə deyil, həm də iki dünya ideologiyası – mühafizəkarlıq və neoliberalizm arasında mübarizə kimi təqdim edilir:
“Nəinki ABŞ-da, bütün dünyada siyasi proseslər üçün ciddi nəticələr vəd edən seçkilərdə mühafizəkarlar qalib gəldi. ABŞ dünya dövlətidir və orada baş verən hadisələr bütün dünyada və müxtəlif ölkələrdə gedən proseslərə təsir edir. Təbii ki, Ermənistan da istisna deyil. Paşinyan administrasiyasının ideologiyası tamamilə neoliberalizmdən ibarətdir. 2018-ci ilin məxməri inqilabı neoliberalların mühafizəkar ideologiyaya sadiq qalan respublikaçılar üzərində qələbəsidir.
Paşinyanın Ermənistanda təmsil etdiyi siyasi hərəkat ABŞ-da məğlub oldu. Güman edilir ki, Trampın qələbəsi Paşinyanı xarici siyasətdə əsas sponsoru olan Vaşinqtonun dəstəyindən məhrum edəcək və bunsuz Paşinyan hakimiyyətdə qala bilməyəcək. Paşinyanın gücü yalnız xarici dəstəyə əsaslanır. Ona qarşı siyasi mübarizə uğursuzluğa düçar olur, çünki o, ABŞ-ın açıq dəstəyindən istifadə edir. Onun hər hansı antidemokratik, diktator addımları ya “demokratik Qərb” tərəfindən bəyənilir, ya da diqqətdən kənarda qalır. Paşinyan çox yaxşı bilir ki, Trampın dövründə o, ABŞ-ın dəstəyini itirəcək. Yeri gəlmişkən, eyni şey Ukrayna Prezidenti Zelenski ilə də baş verir. İndi o (Paşinyan – red.), dəstəyini çox tez dəyişdirməyə və dünyada baş verən dəyişikliklərə uyğunlaşmağa çalışır; qızğın neoliberalistdən superkonservatora çevrilmək istəyir.
Dünyadakı mühafizəkar hərəkatın lideri kimdir? Təbii ki, Paşinyanın yanına tələsdiyi Papa Fransisk. Onun məqsədi Roma Papasını kökündən mühafizəkar, milli və ümumbəşəri dəyərlərin, xristianlığın və kilsənin sarsılmaz müdafiəçisi olduğuna, hər zaman LGBT hərəkatlarına və təbliğatına qarşı çıxdığına və sadəcə olaraq təsadüf nəticəsində bu qüvvələr tərəfindən əsir düşdüyünə inandırmaqdır. O, Trampın qələbəsini şəxsi qələbəsi kimi qiymətləndirir ki, bu da ona bu qüvvələrin əsarətindən xilas olmaq imkanı verir. Dediklərini daha inandırıcı etmək üçün yüksək vəzifəli məmurlarının yarısını işdən çıxarır və hökuməti az qala dağılmış halda Papanın yanına gedir. Papa Paşinyana dəstəyini ifadə edərsə, o, yeni hökumət qurmağa, neoliberalları mühafizəkarlarla əvəzləyərək yeni tip, yeni dəyərlər sistemi tərəfdarlarını vəzifələrə təyin etməyə hazırdır. Hətta ona hakimiyyətdə qalmaq imkanı verilsə, yeni parlament seçkiləri də təşkil edəcək və parlamentin tərkibini dəyişəcək. Onlar Papa Fransiskin cavabının nə olacağını bilmirlər, lakin onun rədd ediləcəyi güman edilir, çünki adamyeyən humanist, antixrist isə müqəddəs ola bilməz.
İddia oluna bilər ki, Tramp 2016-2020-ci illərdə hakimiyyətdə olub və Paşinyanın məxməri çevrilişi məhz bu dövrdə baş verib. Tramp administrasiyası dövründə Paşinyan neoliberal siyasətini həyata keçirə bildi. Amma hamı Trampın ikinci prezidentliyinin əvvəlkindən əhəmiyyətli dərəcədə fərqli olacağı qənaətindədir. O vaxt Tramp açıq müqavimətin onun fiziki məhvinə səbəb ola biləcəyindən ehtiyat edərək neoliberalların xarici siyasətinə uyğunlaşmaq üçün kompromislərə getməyə məcbur oldu. İndi o, həm hakimiyyətdə özünü güclü hiss etmək, həm komandasını, həm də bütün hakimiyyət sistemini tərəfdarları ilə təchiz etmək baxımından artıq daha hazırlıqlıdır”.