Madriddə keçiriləcək sammitdə NATO liderləri Rusiyanı ən böyük təhlükə kimi müəyyən edəcək yeni strateji konsepsiyanı təsdiq edəcəklər.
AzerTimes xəbər verir ki, bunu NATO-nun baş katibi Yens Stoltenberq deyib.
“Yeni konsepsiyamız bizi yeni strateji rəqabət dövrünə aparacaq. Mən müttəfiqlərdən Rusiyanı təhlükəsizliyimiz üçün ən böyük və birbaşa təhdid kimi aydın şəkildə müəyyən edəcəklərini gözləyirəm. Bu konsepsiya ilk dəfə olaraq Çinin maraqlara və dəyərlərə yaratdığı təhdidləri də əhatə edəcək”, – Stoltenberq bildirib.
O qeyd edib ki, Rusiya NATO-nun uzun illərdir qurmağa çalışdığı tərəfdaşlıq və dialoqdan yayınır:
“İndi bu aktual deyil, indi bu Rusiyanın davranışına görə işləmir. Biz buna təəssüflənirik, lakin biz də bu reallığa cavab verməliyik”.
Baş katib xatırladıb ki, 2010-cu ildə təsdiq edilmiş hazırkı strateji konsepsiyanın təsdiqindən əvvəl keçirilən iclasda Rusiyanın o vaxtkı prezidenti Dmitri Medvedyev də iştirak edib.
“Sonra biz Rusiyanın strateji tərəfdaş olduğunu qəbul etdik. Madriddə isə bu baş verməyəcək”.