Rusiya və Azərbaycan müxtəlif sahələrdə əməkdaşlığı ardıcıl şəkildə inkişaf etdirir və bunun əyani sübutu Bakıda imzalanmış ikitərəfli sənədlərin yeni möhkəm paketi oldu.
Bu sözləri AzerTimes-a açıqlamasında rusiyalı politoloq Vitali Arkov deyib.
“Bu, Moskva ilə İrəvan arasında münasibətlərdəki böhranla birbaşa bağlı deyil. Çünki Paşinyanın İrəvanın KTMT-yə üzvlüyü məsələsi ilə bağlı səs-küylü bəyanatları Rusiya ilə Ermənistan arasında iqtisadi əməkdaşlığa heç bir şəkildə təsir göstərmir (ən azı bugünədək). Əksinə, iqtisadi əməkdaşlığın həcmi artır və şübhəsiz ki, bu, erməni tərəfi üçün faydalıdır. Rusiya-Azərbaycan əməkdaşlığının intensivləşməsi, eləcə də Rusiyanın Mərkəzi Asiyadakı etibarlı tərəfdaşlarla əməkdaşlığının genişləndirilməsi Azərbaycan lideri İlham Əliyevin və onun Qazaxıstan, Qırğızıstan, Tacikistan, Türkmənistan və Özbəkistandan olan həmkarlarının müdrikliyini və uzaqgörənliyini göstərir. Tiflisin Moskva ilə diplomatik münasibətlərdə pauzasını nəzərə alsaq belə, Rusiya ilə Gürcüstan arasında ticarət dövriyyəsinin əhəmiyyətli dərəcədə artdığını da müşahidə edirik. Bütün bunların fonunda İrəvandakı siyasətçilərin “atmacaları” olduqca qəribə görünür, yetkinlik yaşına çatmamış yeniyetmənin davranışını xatırladır, ona ən yaxın olanlara qarşı haqsız ittihamlar irəli sürür və yadları bütə çevirir”, – o bildirib.
Arkovun sözlərinə görə, Mixail Mişustinin İlham Əliyev tərəfindən şəxsən qəbul edildiyi Bakı səfəri Fransa və ABŞ-ın Cənubi Qafqazda sabitliyi pozmaq üçün fəaliyyətinin intensivləşməsi fonunda xüsusi əhəmiyyət kəsb edir:
“Mişustin Putindən Əliyevə təkcə növbədənkənar prezident seçkisində inamlı qələbəsi münasibətilə səmimi salam və təbrikləri deyil, həm də ikitərəfli müzakirədə digər mesajları çatdırıb. Moskva və Bakının hər iki paytaxta bilavasitə təsir edən sahələrdə gələcək addımlarını müqayisə edib təhlil etməklə Azərbaycanın paytaxtında dar çərçivədə aparılan danışıqlarda müzakirə olunan ayrı-ayrı məsələlərlə bağlı fərziyyələr irəli sürmək olar”.