Milli Məclisin Mədəniyyət Komitəsinin sədri Qənirə Paşayeva qardaş Qazaxıstandan olan şair-publisistlər – ABAY TV-nin prodüsseri Tanagöz Tolkınqızı, Ekibastuz şəhərinin “Otarka” qəzetinin redaktoru Janargül Kadırova, Qazaxıstan Yazarlar Birliyinin üzvü, teleaparıcı Janayım Auğanbayqızı, “Egemen Qazaxıstan” qəzetinin “Ədəbiyyat və incəsənət” şöbəsinin əməkdaşı Batırxan Sersenxanla görüşüb.
AzerTimes xəbər verir ki, Milli Məclisdə baş tutan görüşdə qardaş ölkələrimiz arasında günü-gündən güclənən əlaqələr, yeni əməkdaşlıq imkanları və aydınların, yaradıcı insanların, o cümlədən şair-yazıçıların, jurnalistlərin üzərinə düşən mənəvi öhdəliklər mövzusunda fikir mübadiləsi aparılıb.
Q.Paşayeva sədri olduğu komitənin mənəvi dəstəyi ilə Bakıda və Sumqayıtda bu il aprelin birinci ongünlüyündə gerçəkləşən silsilə tədbirlərdə yaxından iştirak etdiklərinə görə qazax yazarlarına təşəkkür edib. Komitə sədri Qazaxıstan aydınlarına salam-sayğılarını yetirib, onlara yeni yaradıcılıq uğurları diləyib.