Nyu-Yorkda BMT Baş Assambleyasının 79-cu sessiyası çərçivəsində Rusiya xarici işlər naziri Sergey Lavrov iranlı həmkarı Abbas Arakçı ilə ilk dəfə görüşüb.
AzerTimes xəbər verir ki, bu barədə “Azad İran” Teleqram kanalı məlumat yayıb.
Görüş zamanı İranın nüvə proqramı üzrə Birgə Hərtərəfli Fəaliyyət Planı ətrafında işlərin vəziyyəti, Cənubi Qafqazda və Fələstin-İsrail münaqişəsi zonasında vəziyyət də daxil olmaqla, aktual beynəlxalq və regional problemlər ətrafında geniş fikir mübadiləsi aparılıb.
Xarici siyasət koordinasiyasının hazırkı yüksək səviyyədə saxlanmasında qarşılıqlı maraq vurğulanıb.
Tərəflər Rusiya və İran arasında strateji tərəfdaşlıq münasibətlərinin qurulması xəttinin dəyişməzliyini və əvvəllər razılaşdırılmış bütün birgə layihələrin həyata keçirilməsinə sadiq olduqlarını təsdiqləyiblər.
Nazirlər ali və yüksək səviyyələrdə qarşıdan gələn təmasların qrafikini nəzərdən keçiriblər.
Sergey Lavrov habelə iranlı həmkarını uyğun vaxtda Moskvaya səfərə dəvət edib.