Azərbaycan İlahiyyat İnstitutu (Aİİ) Dillər və ictimai fənlər kafedrasının müdiri, dos. İlkin Əlimuradov Əlcəzair Xalq Demokratik Respublikasının Biskərə, Vəhran 1, Sidi Bilabbas universitetləri və Səudiyyə Ərəbistanı Krallığı Virtual Ədəbiyyat Məclisinin təşkilatçılığı ilə “Kombinativ praqmatika və onun ərəb dilinin tədrisində tətbiqi” mövzusuna həsr olunmuş onlayn formatda keçirilən beynəlxalq elmi konfransda iştirak edib.
Dosent İ.Əlimuradov “Azərbaycanda ərəb dilinin tədrisi: Azərbaycan İlahiyyat İnstitutunun nümunəsində” mövzusunda məruzə ilə çıxış edib. O, ərəb dilinin beynəlxalq dil, İslamın ana dili olması ilə yanaşı, milli irsimizin, xüsusilə Orta əsrlərdən başlayan tarixini araşdırmaqda mühüm əhəmiyyət kəsb etdiyini vurğulayıb.
Məruzəçi daha sonra ölkəmizdə müxtəlif orta və ali təhsil müəssisələrində ərəb dilinin tədrisi ilə bağlı əldə olunan nailiyyətlər və təcrübələrdən bəhs edib. İ.Əlimuradov konfrans iştirakçılarının diqqətini ərəb dilinin dini elmlərin, xüsusilə də İslam ilahiyyatının öyrənilməsindəki müstəsna roluna yönəldib, Azərbaycan İlahiyyat İnstitutunda bu dilin tədrisinə xüsusi əhəmiyyət verildiyini bildirib.
İ.Əlimuradov, həmçinin Azərbaycan İlahiyyat İnstitutu və onun uğurlu fəaliyyəti haqqında ətraflı məlumatları konfrans iştirakçılarının nəzərinə çatdırıb.