Oktyabrın 26-dan başlanan qar Talış dağlarını ağ rəngə boyamışdı. Uzunömürlülər diyarı Lerik çən-dumana bürünmüşdü. Soyuq küləklər əsirdi. Ancaq respublikamızın cənub bölgəsinin insanları yenə də məğrur, qürurlu idi. Nə qar, nə çovğun, nə də soyuq küləklər onları qorxutmurdu. Hər kəs Azərbaycanın təcavüzkar Ermənistanın təxribatlarına cavab olaraq respublikamızın ərazi bütövlüyü, tarixi torpaqlarımızın işğaldan azad edilməsi uğrunda başladığı Vətən müharibəsində qazanılan möhtəşəm qələbənin sevincini yaşayırdı. Zəfər günü ərəfəsində rayonun mədəni-maarif müəssisələrində, təhsil ocaqlarında, idarə və təşkilatlarda silsilə tədbirlər keçirilir, şəhidlərin xatirəsi ehtiramla yad edilir, şəhid ailələri ziyarət olunur, müharibə iştirakçılarının və qazilərin sosial problemlərinin həlli istiqamətində məqsədyönlü fəaliyyətlər göstərilir, Vətən torpaqlarının keşiyində mərdliklə dayanan Azərbaycan əsgərinə mənəvi dəstək göstərilməsi ümumrayon aksiyasına çevrilməkdə idi.
Həmin gün igid əsgər və zabitlərimizin işğaldan azad etdikləri Füzuli rayonundan gələn xəbərləri bu ucqar dağ rayonunun sakinləri də diqqətlə izləyirdilər. Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın Füzuli Beynəlxalq Hava Limanının açılışında və Horadiz-Cəbrayıl-Zəngilan-Ağbənd avtomobil yolunun (Zəngəzur dəhlizi) təməlqoyma mərasimində birgə iştirakı lerliklilərin də böyük sevincinə səbəb olmuşdu.
Müdafiə Nazirliyindən AzerTimes-a verilən məlumata görə, oktyabrın 27-də Azərbaycan Respublikasının Müdafiə Nazirliyi və Lerik rayon İcra Hakimiyyətinin birgə təşkilatçılığı ilə keçirilən Vətən müharibəsinin lerikli şəhidlərinin xatirəsinə həsr olunan anım mərasiminin başlamasına az qalmış sanki bir möcüzə baş verdi. Çən-duman Talış dağlarından çəkildi. Günəş al-şəfəqlərini ətrafa səpələdi. Paytaxt Bakıdan, eləcə də bir çox bölgələrdən gələn qonaqlar, şəhid ailələrinin üzvləri, ictimaiyyət nümayəndələri dağlar qoynunda təntənəli açılışı olacaq Lerik şəhidləri memorial abidəsinin qarşısına toplaşdılar. Azərbaycan Respublikasının və qardaş Türkiyə Respublikasının dövlət bayraqları əzəmətlə dalğalanırdı.
Müdafiə Nazirliyinin, Lerik rayon İcra Hakimiyyətinin rəsmiləri, millət vəkilləri, rayon hüquq-mühafizə orqanlarının rəhbərləri hərbi orkestrin müşayiəti ilə, əklillərlə abidəyə doğru irəlilədilər. Xeyriyyəçiliyi ilə ad çıxaran iş adamı, ehtiyatda olan polkovnik Aslan Hüseynovun təşəbbüsü və təşkilatçılığı ilə inşa edilən Lerik şəhidləri memorial abidəsinin üstündən bəyaz örtük götürüldü.
Qələbəyə gedən yollarda Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarında iştirak edərək hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərkən öz şəhadətləri ilə tarix yazan, adları tarixə yazılan Lerik rayonundan pərvazlanmış 47 şəhidin mərmər lövhələrdə əbədiləşən portretləri günəşin al-şəfəqləri altında daha da parlaq görünürdü.
Həmin anlarda nəinki şəhid valideynləri, müharibə iştirakçıları, hərbi qulluqçular, ümumiyyətlə, qalib Azərbaycanımızın hər bir vətəndaşı qürur hissi keçirirdi.
Memorial-abidə qarşısına Milli Məclisin, Müdafiə Nazirliyinin, Lerik rayon İcra Hakimiyyətinin və digər təşkilatların adından əklillər düzüldü.
Şəhidlərin xatirəsini yad etmək üçün bir dəqiqəlik sükut elan edildi, Hərbi Dəniz Qüvvələri orkestrinin müşayiəti ilə Azərbaycan Respublikasının Dövlət Himni ifa olundu və beləliklə, Vətən müharibəsinin lerikli şəhidlərinin xatirəsinə həsr olunan anım mərasimi başladı…
Bütün bunlar Lerik rayonundan xidməti ezamiyyətdən yenicə qayıdan Əməkdar incəsənət xadimi, Prezidentin fərdi təqaüdçüsü polkovnik Abdulla Qurbaninin ilk təəssüratlarıdır.
Lerik şəhidlərinin anım mərasimində Müdafiə naziri general-polkovnik Zakir Həsənovun adından tədbir iştirakçılarını salamlayan polkovnik A.Qurbani Vətən müharibəsinin ilk günündən bütün xalqımız kimi leriklilərin də bir nəfər kimi ayağa qalxdığını, Müzəffər Ali Baş Komandan İlham Əliyevin ətrafında daha da sıx birləşdiklərini, döyüşən orduya mənəvi və maddi dəstək göstərdiklərini, hər kəsin qələbə əzmi ilə çalışdığını, həm arxa, həm də ön cəbhədə hərb tariximizə şanlı səhifələr yazdıqlarını böyük iftixar hissi ilə qeyd edib. Vətənə layiqli övladlar, ordumuza cəsur, mübariz əsgərlər yetirdiklərinə görə şəhid valideynlərinə bir daha Müdafiə Nazirliyi rəhbərliyinin minnətdarlığını çatdırıb. Hərbi əməliyyatlar zamanı döyüş meydanlarında yaralanan, sağlamlığını itirən döyüşçülərə şəfalar arzulayıb.
Hazırda xidmətdə olan, içdikləri hərbi anda sadiq qalaraq Vətən qarşısında əsgəri borclarını şərəflə, vicdanla yerinə yetirən, düşmən təxribatlarının qarşısını mərdliklə, qətiyyətlə alan əsgər və zabitlərimizin öz həmyerlilərinə müraciəti alqışlarla qarşılanıb.
Nəzərə çatdırılıb ki, bütün qoşun növlərində, eyni zamanda, Vətən müharibəsinin bütün cəbhələrində Lerik rayonundan orduya çağırılan oğullar da əsl şücaət və igidlik nümunələri göstəriblər. Onlardan 47 nəfər son nəfəsinə, son gülləsinədək vuruşaraq müqəddəs məqama – Şəhidlik zirvəsinə ucalıb.
Müharibənin ilk günündə Füzuli rayonu istiqamətində komandiri olduğu tank taborunun şəxsi heyəti ilə birlikdə iki dəfə Sovet İttifaqı Qəhrəmanı, tank qoşunları qvardiya general-mayoru Həzi Aslanovun Böyük Vətən Müharibəsində faşizm üzərində göstərdiyi qəhrəmanlıq nümunəsini erməni faşizmi üzərində təkrarlayan mayor Amid Rəbbil oğlu Heydərov “Vətən Müharibəsi Qəhrəmanı” adına layiq görülüb. Mayor Ramin Mərdan oğlu Ağayev, kapitan Cəlil Ağaddin oğlu Cavadov, kapitan Əbülfəz Hüseynverdi oğlu Rəhmətov, baş leytenant Əliqismət Mükafat oğlu Yaqublu, miçman Elvin Ramiz oğlu Səfərov, müddətdən artıq həqiqi hərbi xidmət hərbi qulluqçusu Elnur Cəlal oğlu Dadıyev, əsgər Çingiz Sulduz oğlu Babayev və başqaları Azərbaycan Respublikası Prezidentinin müvafiq sərəncamlarına əsasən döyüş orden və medalları ilə təltif olunublar.
Lerik rayon İcra Hakimiyyəti başçısının səlahiyyətlərini icra edən Cəlil Baxşıyev, millət vəkili İqbal Məmmədov, “Azərbaycan Bayrağı” ordenli polkovnik-leytenant Etibar Camalov, iki şəhid atası Elman Məmmədov, şəhid kapitan Cəlil Cavadovun dayısı Aslan Hüseynov və başqaları çıxış edərək Vətən müharibəsində qazanılan möhtəşəm qələbənin xalqımızın və dövlətimizin tarixinin şərəfli səlnaməsi olduğunu yüksək qiymətləndiriblər.
Bu qələbənin xalqımızın birliyinin, həmrəyliyinin, qəhrəman ordumuzun əsgər və zabitlərinin şücaətinin, dövlətimizin başçısının qətiyyətinin, sərkərdə məharətinin, hücum diplomatiyasının, dəmir yumruğunun qələbəsi olduğu diqqətə çatdırılıb. Lerikli gənclərin bu gün də ixtisas seçimində hərbi peşələrə böyük maraq göstərdiyi, hazırda yüzlərlə gəncin Silahlı Qüvvələrin sıralarında nümunəvi zabit kimi xidmət etdikləri vurğulanıb.
Vətən Müharibəsi Qəhrəmanı şəhid zabit Amid Heydərovun atası Rəbbil Heydərovun çıxışı tədbir iştirakçılarının böyük marağına səbəb olub. O, deyib: “Zəfər günü ərəfəsində biz şəhid valideynləri nə qədər kədərlənsək də, bir o qədər qürur hissi keçiririk. Övladlarımızın intiqamı alınıb, qanı yerdə qalmayıb. Bir də ona görə fəxr edirik ki, bizim övladlarımızın xidmətləri dövlət səviyyəsində yüksək qiymətləndirilib. Xalqımız şəhidləri böyük izdihamla son mənzilə yola salıb. Dövlətimiz və xalqımız ağrılı, kədərli günlərimizdə bizə dayaq olub. Bu gün də Müzəffər Ali Baş Komandanımız cənab İlham Əliyev, Birinci vitse-prezident xanım Mehriban Əliyeva, həmçinin Müdafiə Nazirliyinin rəhbərliyi diqqət və qayğılarını biz şəhid ailələrindən əsirgəmirlər. Şəhid oğullarımızın xatirəsi ehtiramla yad edilir, onların adları əbədiləşdirilir. Biz oğullarımızı Vətən üçün böyütmüşük, Vətən üçün tərbiyə etmişik. Onlar Vətənin uğrunda şəhidlikləri ilə xalqımızın, millətimizin, o cümlədən biz valideynlərinin başını bütün dünyada uca ediblər. Biz hər birimiz azərbaycanlıyıq, qarabağlıyıq. Məhz bu böyük Zəfərə, Qələbəyə də birliyimizlə, həmrəyliyimizlə, gücümüzlə nail olmuşuq. Azərbaycan yenilməzdir! Azərbaycanın müstəqilliyi əbədi və sarsılmazdır! Qarabağ Azərbaycandır!”
Azərbaycan Respublikası Prezidentinin sərəncamları ilə ölümündən sonra təltif olunan hərbi qulluqçuların layiq görüldükləri orden və medallar onların ailələrinə təqdim edilib.
Müdafiə Nazirliyinin nəşri olan “Vətən müharibəsi şəhidləri” kitabı (müəllif Abdulla Qurbanidir) şəhid ailələrinə, rayon kitabxanaları və Tarix-diyarşünaslıq muzeyinə hədiyyə edilib.
Həzi Aslanov adına Ordu İdeoloji Mədəniyyət Mərkəzinin solistləri Əməkdar artist Cahangir Qurbanov, Nigar Rəhimova, Ağabala Abdullayev, Günay Qasımova və Mətləb Ağayevin ifa etdikləri zəfər nəğmələri, hərbi marşlar və şəhidlərin xatirəsinə həsr olunan vətənpərvərlik mahnıları böyük marağa səbəb olub.
Vətən Müharibəsi Qəhrəmanı Amid Heydərovun büstü ucaldılan park, həmçinin 2020-ci il oktybarın 27-də Füzuli rayonunun işğaldan azad edilməsi uğrunda döyüşlərdə qəhrəmancasına şəhid olan kapitan Cəlil Cavadovun məzarı ziyarət edilib.
Lerik rayonunda keçirilən anım mərasimi şəhidlərimizin xatirəsinə sonsuz ehtiram olmaqla yanaşı, həm də ulu öndər Heydər Əliyevdən miras Azərbaycançılıq məfkurəsinin və ordu-xalq birliyinin təntənəsinə çevrilib.