Xəbər - Samir Əli – Trend:
Göyçay rayon Mərkəzi Xəstəxanası sosial şəbəkələrdə xəstəxanadan yeni əməliyyat olunan xəstənin məcburi çıxarılması ilə bağlı yayılan iddialara cavab verib.
Xəstəxananın direktor müavini Ləman Hacıyeva AzerTimes-a açıqlamasında bildirib ki, yayılan məlumatlar həqiqəti əks etdirmir:
“Avqustun 18-də Göyçay rayon Qaraməryəm kənd sakini, 1967-ci il təvəllüdlü Mehdiyev Elxan Qəbil oğlu “mədə xorasının deşilməsi” diaqnozu ilə xəstəxanaya qəbul edilib və təcili olduğu üçün dərhal əməliyyata götürülüb. Xəstəxanaya qəbul olunarkən xəstədən “COVİD-19” virusu ilə bağlı analiz götürülüb və labaratoriyaya göndərilib.
Avqustun 23-də xəstənin analizlərinin cavabı pozitiv çıxdığı üçün o Gəncə modul tipli pandemiya xəstəxanasına yazılıb. Xəstənin Gəncə modul tipli Xəstəxanaya köçürülməsi üçün tibbi heyət və təcili yardım avtomobili ayırsaq da, xəstənin oğlu Qəbilzadə Qərib Elxan oğlu buna etiraz edərək atasını ev şəraitində müalicə edəcəyini bildirdi. Qərib Qəbilzadə bununla bağlı rəsmi imtina ərizəsi yazaraq xəstəni evlərinə apardı. Biz xəstənin oğlu və yaxınlarına izah etdik ki, əməliyyatdan çıxan xəstənin hazırki vəziyyətinə görə stasionar müalicə almaslı məqsədəuyğundur. Onlar isə buna məhəl qoymadı və avqustun 23-də səhər saatlarında xəstəni evlərinə apardılar. Hadisədən bir-neçə saat sonra yaxınları xəstəni xəstəxanaya gətirdilər və məcburi halda xəstəni Göyçay Mərkəzi Xəstəxanasına yerləşdirməyimizi tələb etdilər. Biz isə xəstədə COVİD-19 virusu aşkarlandığı üçün onu qəbul edə bilmədik. Yenidən onlara izah olundu ki, bu xəstə Gəncə modul tipli xəstəxanaya yerləşdirilməlidir. Xəstənin yaxınları isə hay-küy salaraq xəstəni bu xəstəxanaya yerləşdirəcəklərini dedilər”.
L. Hacıyeva bildirib ki, xəstə bu səbəbdən xəstəxanaya qəbul edilməyib və yenidən Gəncə modul tipli xəstəxanaya yazılıb: “Bizim xəstəxanada müxtəlif xəstəliklərdən stasionar müalicədə olan xəstələr var. Onların təhlükəsizliyi üçün COVİD – 19 xəstələrini qəbul etməyə ixtiyarımız yoxdur. Ölkədə COVİD xəstələri üçün kifayət qədər xəstəxanalar ayrılıb və xəstəliyə uyğun müalicə prosedurları aparılır. Ona görə də bu tip xəstələri bizim qəbul etməyimiz qadağandır. Xəstənin yaxınları isə bunu dərk etmir, öz rahatklıqları üçün xəstəxanadakı digər xəstələrin həyatını təhlükəyə atmağa cəhd ediblər”.
Twitter: @GuleliyevSamir
