FHN-in sabiq baş həkiminin məhkəməsində şahidlər ifadə verib: 600 manat istədilər, 500 manat ödədim…

Xəbər - Samir Əli -AzerTimes:

Bakı Ağır Cinayətlər Məhkəməsində Fövqəladə Hallar Nazirliyinin (FHN) Tibb Xidmətinin Modul Tipli Hospitalının həbsdə olan sabiq baş həkimi İmran Ağayev, müəssisənin vəzifəli şəxsləri olan Rüfət Vəlizadə, Taleh İmanlı və Qulu Orucovun cinayət işi üzrə məhkəmə prosesi davam etdirilib.

AzerTimes-in məlumatına görə, hakim Faiq Qəniyevin sədrliyi ilə keçirilən prosesdə ifadə verən şahid Aytən Əliyeva bildirib ki, atasını koronavirus xəstəliyi ilə bağlı Fövqəladə Hallar Nazirliyinin modul tipli xəstəxanasına yerləşdirmək üçün 500 manat verib: “Atam koronavirusa yoluxmuşdu, vəziyyəti ağır idi. Xəstəxanaya qəbul üçün 600 manat istədilər, 500 manat ödədim. Dedilər ki, xidməthaqqıdır, amma qəbz təqdim etmədilər”.

Şahid pulu kimə verdiyini xatırlamadığını deyib.

Daha sonra prosesdə ifadə verən digər şahid Rauf Əhmədov isə təqsirləndirilən şəxslərdən heç kimi görmədiyini deyib: “Qayınanam xəstələnmişdi, Neftçilər Xəstəxanasına zəng vurduq, təcili yardım çağırdım. Təcili yardımla Mərkəzi Neftçilər Xəstəxanasına gətirdilər. Orada müayinə olunduqdan sonra məlum oldu ki, ciyərlərində buzlu şüşə var, sonra “Medistyle” Klinikasına 300 manat ödədim. Sonra qayınanamı onu nazirliyin modul tipli xəstəxanasına yerləşdirdik. Xəstəxanada heç kimə pul verməmişəm”.

Proses noyabrın 25-də davam etdiriləcək.

Qeyd edək ki, istintaq zamanı İmran Ağayevin həmin vəzifədə işləyərkən müəssisənin vəzifəli şəxsləri olan Rüfət Vəlizadə, Taleh İmanlı və Qulu Orucov ilə qabaqcadan əlbir olaraq hospitalın “VİP korpus”larına yerləşdirilərək daha yüksək səviyyəli tibbi və sair təminatla təchiz edilməsi müqabilində 6 nəfər şəxsdən ümumilikdə 10 min 500 manat pul vəsaitini almasına, həmçinin yenidən əmək müqaviləsinin bağlanması yolu ilə həmin müəssisədə fəaliyyətlərini davam etdirmələrinə görə hospitalın ayrı-ayrı əməkdaşlarından cəmi 5 min manat məbləğində pul vəsaitini rüşvət qismində istəməsinə əsaslı şübhələr müəyyən edilib.

İmran Ağayevin fasiləsiz şəkildə müəssisəyə qəbul olunmalarına dair görüntü yaratmaqla COVID-19 pandemiyasından əziyyət çəkən 140 nəfər xəstənin özünün təsisçisi və direktoru olduğu “Medi Style” MMC-nə məxsus Təcili Tibbi Yardım avtomobilləri vasitəsi ilə Modul Tipli Hospitala aparılması müqabilində həmin şəxslərdən xidmət haqqı qismində ümumilikdə cəmi 51 min 600 manat məbləğdə pul vəsaitini almasına əsaslı şübhələr müəyyən edilib.

Həmçinin, İmran Ağayevin müxtəlif tarixlərdə verdiyi COVID-19 test nəticəsi pozitiv çıxmış Rüfət Vəlizadənin (müəssisənin vəzifəli şəxsi) mütəmadi olaraq sərbəst şəkildə tibb müəssisəsinin inzibati binasını tərk edərək sərbəst şəraitdə hərəkət etməsinə şərait yaratmasına, həmin hərəkətləri ilə epidemiya əleyhinə, sanitariya-gigiyena və karantin rejimi qaydalarını pozaraq xəstəliyin yayılması ilə bağlı ağır nəticələrə səbəb olan real təhlükə yaratmasına əsaslı şübhələr müəyyən edilib.İş üzrə toplanan sübutlar əsasında

İmran Ağayev və digərlərinə müvafiq olaraq Cinayət Məcəlləsinin 139-1.2 (epidemiya əleyhinə rejimin, sanitariya-gigiyena və ya karantin rejimlərinin pozulması ağır nəticələrə səbəb olduqda), 308.2 (vəzifə səlahiyyətlərindən sui-istifadə etmə ağır nəticələrə səbəb olduqda), 311.3.1, 311.3.2 (rüşvət alma qabaqcadan əlbir olan bir qrup şəxs tərəfindən təkrar törədildikdə) maddələri ilə yekun ittiham elan edilib.

Teqlər: