İran və Azərbaycan kinomatoqrafçılarının birgə istehsalı olan “Sərhəd; Arpaçay, ayrılıq nəğməsi” filminə ilk dəvəti 2017-ci ilin yanvar ayında aldım. Lakin o zaman teatrda yarımçıq işlərim var idi. Açığı bir az da çəkinirdim. Yaya kimi vaxt istədim, sağ olsunlar, gözlədilər.
Bu sözləri AzerTimes-a açıqlamasında adıçəkilən filmdə baş rollardan birini canlandıran aktyor Əmrah Dadaşov deyib.
Çəkilişlərdən danışan aktyor güneylilərin xoş və isti münasibətini də xüsusi vurğulayıb:
“Çəkilişlər çox maraqlı keçirdi. Əsasən, Bazirqan və Maku şəhərlərinin ərazilərində olurduq. Bizə çox böyük hörmət göstərirdilər: həm çəkiliş heyəti, həm də yerli camaat. Mən orda Güney azərbaycanlıların bizi necə sevdiklərinin canlı şahidi oldum. Hətta çəkilişlər bitdikdən sonra bizi buraxmadılar, Təbrizə dəvət etdilər”.
O, çəkiliş əsnasında yaşanan hadisəni də yada salıb:
“Çəkilişlərin getdiyi ərazi həm də Ermənistanla sərhəd idi. Sərhəd yaxınlığında qarşı tərəf Azərbaycanın əsgər formasını görüb bərk təşvişə düşdü və hərbi hissəyə zəng vuraraq, öz narahatçılıqlarını bildirdilər”.
Ekran əsərinin ölkəmizdə təqdimatının baş tutmamasından danışan aktyor buna pandemiyanın səbəb olduğunu bildirib:
“Filmin təqdimatı, əslində, burda da olmalı idi. Lakin pandemiya dövrünə düşdüyü üçün alınmadı. Amma İranda, Amerikada, İngiltərədə yayımlandı, bir çox beynəlxalq festivalda iştirak etdi. Bir mən, bir də mənim komandirimi oynayan Elxan İsmayılovdan başqa filmdə bütün aktyorlar İrandan idi. Bunu filmin rejissoru Əli bəy özü belə istəyib”.
Aktyor həmçinin, filmin məzmununa toxunaraq izləyiciyə ötürmək istədiyi mesajı da diqqətə çatdırıb:
“Film İran və Azərbaycan sərhədində Azərbaycan əsgəriylə, çobanlıq edən Cənubi azərbaycanlı bir qızın, yəni Arazın bu tayında olan Aydınla, o taydakı çoban qız Aynazın imkansız eşqindən bəhs edir. Onlar nədənsə üz-üzə gələndə danışa bilmirlər. Sərhədi birlikdə qoruyan İran əsgəri dostu azərbaycanlı həmkarına qızla yazışmağı təklif edir. Ancaq eyni dildə danışsalar da, istifadə etdikləri əlifbanın fərqli olduğunu görürlər. Ona görə də İran hərbçiləri azərbaycanlı hərbçilərin məktublarını tərcümə etməyə başlayırlar. Beləliklə, onlar bir-birinin əlifbasını öyrənirlər. Amma… Bu, sadəcə iki insanın bir-birinə olan nakam məhəbbətindən yox, Arazın hər iki tayındakı bütün soydaşlarımızın bir-birinə olan həsrətindən bəhs edir, əslində. Bir-birinə qovuşa bilməyən aşiqlər, ya da bir-birinə qovuşa bilməyən xalq! Bir sözlə, filmdə nəinki nakam məhəbbət, həm də vətənin Araz boyda dərdi, bir xalqın ikiyə bölünmüş yarası da acı reallıq olaraq izləyiciyə təqdim edilir”.
Qeyd edək ki, Əli Abdalinin rejissorluğu ilə çəkilən “Sərhəd; Arpaçay, ayrılıq nəğməsi” filmi 2018-ci ildə izləyicilərə təqdim edilib. Filmin musiqiləri Alim Qasımov və Rübail Əzimov tərəfindən ifa olunub. Ekran əsəri üçün xüsusi vizual effektlər Ukraynada tamamlanıb.