Xəbər verdiyimiz kimi, bu gün Prezident İlham Əliyevin sərəncamı ilə Dövlət Gömrük Komitəsinin sədri Səfər Mehdiyev vəzifəsindən azad edilib.
AzerTimes xəbər verir ki, onun bir müddətdir DTX-nin Gömrük Komitəsində apardığı əməliyyatlar nəticəsində ikisi general olmaqla, bir sıra mühüm vəzifəli şəxslərin həbsi fonunda işdən azad edilməsi DGK-də ciddi problemlərin mövcudluğunu göz önünə gətirir.
Səfər Məmməd oğlu Mehdiyev – gömrük xidməti general-polkovniki, “Vətənə xidmətə görə” ordeni tam kavaleridir.
O, 17 mart 1973-cü ildə Naxçıvanda anadan olub. Orta təhsili başa vurduqdan sonra həqiqi hərbi xidmətə yollanıb.
Yalnız 1998-ci ildə Türkiyənin Egey Universitetinin Beynəlxalq İqtisadi Əlaqələr fakültəsini beynəlxalq iqtisadi əlaqələr ixtisası üzrə bitirib. Daha sonra Azərbaycan Dövlət İqtisad Universitetinin maliyyə ixtisası üzrə magistr dərəcəsi alıb.
2010-cu ildə isə Bakı Dövlət Universitetini hüquq fakültəsi ilə təhsilini tamamlayıb.
Əmək fəaliyyətinə 1990-cı ildə Naxçıvan Muxtar Respublikasının Babək rayonu Nehrəm kənd kolxozunda başlayıb.
1999–2004-cü illərdə Azərbaycan Respublikası Dövlət Gömrük Komitəsinin Maliyyə-Tarif və Valyuta Nəzarəti Baş İdarəsinin Gömrük tariflərinin tənzimlənməsi şöbəsinin inspektoru, böyük inspektoru, Gömrük dəyəri şöbəsinin rəisi, həmin Baş İdarənin rəis müavini vəzifələrində çalışıb.
2004-dən 2006-cı ilin fevral ayına qədər Azərbaycan Respublikası Dövlət Gömrük Komitəsi sədrinin müavini, 2006-cı ilin fevral ayından Azərbaycan Respublikası Dövlət Gömrük Komitəsi sədrinin birinci müavini vəzifəsində xidmət edib. 23 aprel 2018-ci ildə Dövlət Gömrük Komitəsi sədri vəzifəsinə təyin edilib.
30 yanvar 2020-ci ildə gömrük xidməti general-polkovniki ali xüsusi rütbəsi alıb.
16 iyul 2022-ci ildə Azərbaycan Respublikası Prezidentinin Sərəncamı ilə Dövlət Gömrük Komitəsi sədri vəzifəsindən azad edilib.
Ailəlidir, 2 övladı var.