“Avrora” MMC-nin Quba rayon filialında yol verilmiş qanunsuzluqlarla bağlı Rayon Prokurorluğunda Cinayət Məcəlləsinin müvafiq maddələri ilə cinayət işi başlanaraq istintaq aparılmışdır.
Quba Rayon Prokurorluğundan AzerTimes-a verilən məlumata görə, aparılmış istintaqla müəyyən edilmişdir ki, Rəhman Fətəliyev 2018-2019-cu illər ərzində həmin filialın satış üzrə nümayəndəsi vəzifəsində işləyərkən öz qulluq mövqeyindən istifadə edib ona etibar edilmiş 26 min 900 manat məbləğində pulu xəzinəyə təhvil verməyərək mənimsəmişdir.
Həmçinin, Tarlan Amrakhzade həmin filialın satış üzrə bölmə rəhbəri vəzifəsində işləyərkən 2019-cu ilin sentyabr ayında öz qulluq mövqeyindən istifadə edib ona etibar edilmiş ümumillikdə 6 min 500 manat məbləğində pulu xəzinəyə təhvil verməyərək öz şəxsi ehtiyyacları üçün xərcləyərək mənimsəmişdir.
Rəhman Fətəliyev və Tarlan Amrakhzade CM-nin 179.2.3, 179.2.4-cü ( şəxs tərəfindən öz qulluq mövqeyindən istifadə etməklə xeyli miqdarda mənimsəmə və ya israf etmə) maddələri ilə təqsirləndirilən şəxs qismində cəlb edilərək barələrində başqa yerə getməmək haqqında iltizam qətimkan tədbiri seçilmişdir.
İbtidai istintaq dövründə dəymiş ziyanın tam ödənilməsi təmin edilmişdir.
Hazırda cinayət işi aidiyyəti üzrə baxılması üçün Rayon Məhkəməsinə göndərilmişdir.