Macarıstan Avropa Birliyinin Ukraynaya yardımına dəstək verməyə hazırdır, lakin onun birliyə üzvlüyü Budapeşt üçün “qırmızı xətt” olaraq qalır.
AzerTimes xəbər verir ki, bu barədə “Blumberq” Macarıstan Baş nazirinin siyasi məsələlər üzrə müşaviri Balazs Orbana istinadən məlumat yayıb.
Müşavirin sözlərinə görə, Macarıstan Avropa fondlarından ona nəzərdə tutulan vəsaitin buraxılması müqabilində vetonu ləğv etməyə hazırdır:
“AB-nin Macarıstan üçün vəsaiti və Ukraynaya ayrılan vəsait iki ayrı məsələdir. Lakin AB Ukraynaya maliyyənin düzəliş edilmiş AB büdcəsindən gəlməli olduğunu hesab edirsə, o zaman iki məsələ bir-birinə bağlıdır”.
Qeyd edək ki, Avropa Birliyi (AB) Macarıstanı bu həftə keçiriləcək sammitdə Kiyevə 50 milyard avroluq (54 milyard dollar) yardım proqramını dəstəkləməyə razı salmaq niyyətindədir.
AB-nin ümumi büdcəsindən bu cür ödənişlər bütün üzv dövlətlərin yekdil dəstəyini tələb edir.