Bu gün bir çox Avropa ölkələri Azərbaycanla strateji tərəfdaşlığı dərinləşdirməyə və mühüm strateji əhəmiyyətə malik regional layihələrin birgə icrasına hazırlıqlarını bəyan edirlər. Azərbaycanın etibarlı tərəfdaş olması, eləcə də Avropanın enerji təhlükəsizliyində rolunun getdikcə artması Avropa Birliyi ölkələrinin bu münasibətini formalaşdıran əsas amil kimi çıxış edir.
AzerTimes xəbər verir ki, bu sözləri deputat Kamaləddin Qafarov deyib.
“Fevralın 3-də Bakıda, “Gülüstan” sarayında Cənub Qaz Dəhlizi Məşvərət Şurası çərçivəsində nazirlərin 9-cu və Yaşıl Enerji Məşvərət Şurası çərçivəsində nazirlərin 1-ci iclasının keçirilməsi deyilənləri təsdiq edir. Bir il bundan öncə Bakıda Cənub Qaz Dəhlizi Məşvərət Şurasının səkkizinci toplantısı keçirilmişdi. Prezident İlham Əliyevin də öz çıxışında qeyd etdiyi kimi, ötən bir ildə dünyada qlobal dəyişikliklər baş verib və bu proses hələ də davam edir. Məhz bu proseslərin fonunda enerji təhlükəsizliyi məsələlərinin hər bir ölkə üçün əhəmiyyəti daha da artır və bu problem artıq milli təhlükəsizlik məsələsinə çevrilib. Yaranmış yeni reallıqlar fonunda Avropaya qaz nəqli üçün yeni marşrutların qurulması və yeni mənbələrin cəlb olunması istiqamətində görülmüş işlərin əhəmiyyəti bu gün özünü xüsusilə qabarıq şəkildə göstərməkdədir. İki ildir ki, Cənub Qaz Dəhlizi açılıb və bu gün artıq TANAP-ın 16 milyard kubmetrdən 30 milyard kubmetrə qədər genişləndirilməsi nəzərdən keçirilir. Həmçinin TAP-ın ötürücülük qabiliyyətinin 10 milyard kubmetrdən 20 milyard kubmetrə qədər qaldırılması müzakirə olunur. Bu bir daha göstərir ki, Avropada alternativ enerji mənbəyinə ehtiyac çox böyükdür və enerji təchizatının davamlı şəkildə şaxələndirilməsi zəruridir”, – Qafarov bildirib.
Deputat Avropaya Azərbaycandan təbii qaz ixracı həcminin artmasının ölkəmizin beynəlxalq mövqelərini daha da möhkəmləndirən amil olduğunu vurğulayıb:
“Avropaya Azərbaycandan təbii qaz ixracı getdikcə artır. Bu göstərici 2021-ci ildə təxminən 19 milyard kubmetr, ötən il isə 22,6 milyard kubmetr həcmində olub. Bu il isə ixrac həcminin 24,5 milyard kubmetr olması gözlənilir. Ötən ilin iyulunda Bakıda Azərbaycan Prezidenti cənab İlham Əliyev və Avropa Komissiyasının rəhbəri xanım Ursula fon der Leyen tərəfindən imzalanmış enerji sahəsində Strateji Tərəfdaşlıq haqqında Memorandum uğurla icra olunur. Dövlət başçısının dediyi kimi, bu sənəd əslində, gələcək planlar üçün aydın yol xəritəsidir. Ölkəmiz Avropaya qaz ixracını 2027-ci ilə qədər iki dəfə artırmağı planlaşdırır və bunun üçün Azərbaycanın resursları var. Azərbaycanla Avropa arasında çox yüksək səviyyədə qarşılıqlı etimad və siyasi iradə mövcuddur. Cənab Prezident ötən il baş vermiş mühüm hadisələrdən biri kimi Yunanıstanla Bolqarıstan arasında interkonnektorun açılmasını qeyd etdi. Vurğulandı ki, bu, Cənub Qaz Dəhlizi layihəsi və müəyyən dərəcədə onun şaxələndirilməsi sayəsində mümkün oldu və nəticədə təbii qazın Bolqarıstana təchizini başlamaq imkanını yarandı. Bu genişləndirmə və interkonnektorlar vasitəsilə qonşu ölkələrə də dəhlizin genişləndirilməsi nəzərdə tutulur. O cümlədən, dekabr ayında Azərbaycan və Rumıniya arasında da qaz təchizatı haqqında saziş imzalandı. Beləliklə, Rumıniya da Cənub Qaz Dəhlizində iştirak edən ölkələr sırasına qoşuldu. Yaşıl Enerjinin istehsalı və nəqli sahəsində Azərbaycan, Gürcüstan, Macarıstan və Rumıniya arasında Saziş imzalandı. Bu, enerji təhlükəsizliyində artıq tamamilə yeni bir səhifənin açılması deməkdir. Yeri gəlmişkən, Cənub Qaz Dəhlizinin Məşvərət Şurası çərçivəsində ilk olaraq Yaşıl Enerji Məşvərət Şurası keçiriləcək”.
K.Qafarov Azərbaycanın bərpaolunan enerji istehsalı sahəsində atdığı addımların əhəmiyyətini də vurğulayıb:
“Azərbaycanın bir müddət əvvəl aşkar olunmuş böyük bərpa olunan enerji potensialı ölkəmizin bu enerji təhlükəsizliyi məsələləri ilə bağlı mövqelərini daha da gücləndirir. Bu gün ölkəmizdə “Masdar” və “ACWA Power” kimi investorlarla birlikdə günəş və külək enerjisinin istehsalı ilə bağlı iki sərmayə layihəsi həyata keçirilir. Bu layihələrin ümumi həcmi 470 meqavatdır. Prezident İlham Əliyev öz çıxışında bu yaxınlarda BP şirkəti ilə birlikdə bir layihənin icrasına başlanacağını açıqladı. Bildirildi ki, bu, işğaldan azad olunmuş Cəbrayıl rayonunun ərazisində inşa ediləcək 240 meqavatlıq elektrik stansiyası olacaq. Beləliklə, üç layihənin ümumi gücü 710 meqavat təşkil edəcək. Başqa sözlə, təxminən bir il və ya ilyarım ərzində Azərbaycan bu həcmdə bərpaolunan enerji istehsal edəcək. Bu isə yüz milyonlarla kubmetr qaza ixrac məqsədləri üçün qənaət etməyə imkan verəcək. Perspektivdə isə həm quruda, həm də dənizdə 25 qiqavat bərpaolunan günəş və külək enerjisi istehsal olunacaq”.