Binaya görə ağacları qırırlar

Binaya görə ağacları qırırlar

Bakıın daha bir ərazisində kütləvi şəkildə ağac qırılması faktı qeydə alınıb. Budəfəki hadisə Bakının Yasamal rayonu mətbuat prospektində yerləşən Ovçular Evi ətrafında qeydə alınıb.

Ağacların kəsilməsi sosial şəbəkədə ciddi qınaq obyektinə çevrilib. Belə ki, çoxlu sayda küknar ağacı ekskavator vasitəsilə ala-yarımçıq olaraq qırdırılıb.
Halbuki, bu ağacları xüsusi texnikalar ilə yerini dəyişdirmək mümkündür.

Qeyd edək ki, sökülən binanın yerində Milli Məclisin deputatları üçün yaşayış binası tikiləcək. Ərazidə yerləşdirilən məlumat lövhəsinə əsasən demək olar ki, binanın söküntü işlərini “Böyük Plaza” adlı tikinti şirkəti aparır.

Tikiləcək binada isə yaşayış evlərindən əlavə, alış-veriş və əyləncə mərkəzi də olacaq.

Xatırladaq ki, 2014-cü ildə “Azərovçu” kimi tanınan “Azərbaycan Ovçular və Balıqçılar Cəmiyyəti” İctimai Birliyinin fəaliyyəti ilə bağlı ziddiyyətli xəbərlər gündəmə çıxırdı. Cəmiyyətə məxsus “Ovçular evi” binasının sökülərək yerində böyük biznes mərkəzinin tikiləcəyinə dair xəbərlər yayılmışdı.

Ekologiya və Təbii Sərvətlər Nazirliyi tərəfindən “Azərovçu” tərəfindən saysız-hesabsız qanun pozuntularına yol verildiyi müəyyən edildiyindən hələ 2006-cı ildə ETSN ilə “Azərovçu” arasında ovçuluq təsərrüfatlarının idarə olunmasına dair bağlanmış müqavilələr ləğv edilib. Bütün ovçuluq təsərrüfatları Nazirliyin balansına keçirilib.