Bakı metropolitenin 24 stansiyası və tunelləri lider mobil operatorun şəbəkəsi ilə əhatə olunub
“Bağlantını asanlaşdırır, həyatı daha dolğun edirik” strateji məqsədi ilə fəaliyyətinin yeni dönəminə qədəm qoyan Azercell abunəçilərini yüksəksürətli mobil internet xidmətləri ilə təmin etməyə davam edir. Lider mobil operator Bakı metropolitenində bu istiqamətdə apardığı işləri yekunlaşdıraraq iki il davam edən layihə nəticəsində metropolitenin 24 stansiyasını və tunellərini 4G şəbəkəsi ilə əhatə edib. Beləliklə, Azercell abunəçiləri hətta qatarın hərəkətdə olduğu zaman da dayanmadan mobil internet xidmətlərindən yararlanaraq dostları ilə yazışa, videolar izləyə və musiqi dinləyə bilərlər.
Azercell-in 4G şəbəkəsi Neftçilər, Qara Qarayev, Koroğlu, Həzi Aslanov, Əhmədli, Xalqlar dostluğu, Ulduz, Nəriman Nərimanov, Gənclik, 28 may, Nizami, Elmlər Akademiyası, İnşaatçılar, 20 yanvar, Memar Əcəmi, Memar Əcəmi 2 (Bənövşəyi xətt), Avtovağzal, Nəsimi, Azadlıq prospekti, Dərnəgül, Cəfər Cabbarlı, Xətai, Sahil və İçəri şəhər stansiyalarında, eləcə də bu stansiyaların tunellərində aktivdir.
Qeyd edək ki, Azercell Bakı metropolitenində şəbəkəsinin əhatə dairəsinin genişləndirilməsi üzrə işlərə 2019-cu ilin dekabr ayında start verib. Artıq 2020-ci ilin ilk rübündə sərnişin sayının daha çox olduğu mərkəzi metro stansiyalarında işlər tamamlanıb. Belə ki, layihənin ilk mərhələsində Gənclik, 28 May, Elmlər Akademiyası və Nizami metro stansiyaları Azercell-in yüksək keyfiyyətli şəbəkəsi ilə təmin olunub.
Xatırladaq ki, dünya miqyaslı telekommunikasiya şirkəti olan Ericsson-un apardığı bençmarkinq araşdırmalarına əsasən, Azercell-in şəbəkəsi bir çox keyfiyyət göstəricilərinə görə dünya üzrə yüksək nəticə nümayiş etdirməklə “Best in class” kateqoriyasına daxil olub.