Ermənistan Təhlükəsizlik Şurasının katibi Armen Qriqoryan 10 noyabr 2020-ci il bəyanatının tələbinə uyğun olaraq Ermənistan ordusunun qalıqlarının Azərbaycan ərazisindən çıxması barədə açıqlaması ətrafında yaranan müzakirələrlə bağlı erməni mediasına geniş müsahibə verib.
AzerTimes Yenipress.az-a istinadən sözügedən müsahibəni təqdim edir:
– Cənab Qriqoryan, son vaxtlar Ermənistan Respublikasının öz qoşunlarını Qarabağdan çıxarması və bununla da Dağlıq Qarabağı (qondarma və separatçı rejim nəzərdə tutulur – red.) müdafiəsiz qoyması ilə bağlı tənqidlər getdikcə artır. Bunlara münasibətiniz necədir?
– Müharibə zamanı Ermənistan silahlı qüvvələrinin bir sıra bölmələri DQ “müdafiə ordusu”nun (Ermənistan Qarabağdakı silahlı separatçıları “ordu” adlandırmaqla beynəlxalq qanunları pozur, üstəlik, riyakarcasına guya 2020-ci ildə “köməyə” gəldiyini deyir, halbuki işğal altında uzun illər saxlanılan Qarabağda Ermənistan ordusunun yerləşdiyini hər kəs bilir və bunu Ermənistanın sabiq başçıları, o cümlədən hazırkı hökuməti də etiraf ediblər – red.) köməyinə gəldi. Atəşkəs rejiminin yaradılmasından və Rusiya Federasiyasının sülhməramlı kontingentinin Qarabağa yerləşdirilməsindən sonra Ermənistan ordusunun bölmələrinin Qarabağdan çıxarılması tamamilə təbiidir.
– Amma bu, “Dağlıq Qarabağ”ı doğrudan da müdafiəsiz qoymaq demək deyilmi?
– Xeyr, əvvəllər DQ-nin təhlükəsizliyinin təmin edilməsi funksiyalarını DQ “müdafiə ordusu” yerinə yetirirdi. Və bu baxımdan heç nə dəyişməyib. Lakin qeyd etmək lazımdır ki, Rusiya sülhməramlı qüvvələrinin Qarabağa yerləşdirilməsi təhlükəsizliyin təminatı olmalıdır.
– Amma Fərruxda baş verənlər bunun belə olmadığını göstərdi…
– Fərrux hadisələri 9/10 noyabr 2020-ci il tarixli üçtərəfli bəyanatı və qüvvədə olan beynəlxalq hüququ kobud şəkildə pozur. Azərbaycan Silahlı Qüvvələrinin bölmələri Dağlıq Qarabağda Rusiya sülhməramlı qüvvələrinin məsuliyyət zonasına daxil olub. Rusiya Federasiyası bizi əmin etdi ki, Azərbaycan qüvvələri oradan çıxarılmalıdır və biz ümid edirik ki, Rusiya sülhməramlı qüvvələri Dağlıq Qarabağdakı Rusiya sülhməramlı qüvvələrinin məsuliyyət zonasından Azərbaycan birləşmələrinin çıxarılmasını təmin edəcəklər. Rusiya sülhməramlı qüvvələrinin mövcudluğu özlüyündə Rusiya Federasiyası tərəfindən “Dağlıq Qarabağ əhalisi” üçün real təhlükənin mövcudluğunun tanınmasından xəbər verir və sülhməramlı qüvvələrin Dağlıq Qarabağ ermənilərinin təhlükəsizliyinin təmin edilməsində əsas əhəmiyyəti var.
– “Dağlıq Qarabağ”da Ermənistan ordusunun çağırışçıları müqaviləli əsgərlərlə əvəzlənir, yoxsa Ermənistan ordusunun bölmələri “Dağlıq Qarabağ”ı tərk edir?
– Doğrusu, müharibə nəticəsində Ermənistan ordusunun bir sıra bölmələri “müdafiə qüvvələri”nə kömək etmək üçün Dağlıq Qarabağa daxil olub. Atəşkəsdən sonra onlar Ermənistan Respublikasına qayıdırlar. Bu proses yekunlaşmaq üzrədir və sentyabrda başa çatacaq. “Müdafiə ordusu”na gəlincə, o, “Dağlıq Qarabağ”da olub və orada qalmaqda davam edir.
– Yəni sentyabrdan sonra “Dağlıq Qarabağ”da erməni çağırışçı olmayacaq?
– Xeyr. Amma “Dağlıq Qarabağın hakimiyyət orqanları”ndan aldığımız məlumata görə, “Dağlıq Qarabağ”dan çağırışçılar əvvəlki kimi hərbi xidmətə çağırılacaqlar.
– Bəs müqavilədə olanlar?
– “Dağlıq Qarabağın hakimiyyət orqanları”ndan aldığımız məlumata görə, istər keçmişdə, istərsə də hazırda müqaviləli əsgərlər də xidmət edəcəklər.
– Ermənistandan da?
– Ermənistandan müqavilə ilə gələn hərbçilər “Dağlıq Qarabağ müdafiə ordusu”na çağırılmır. Lazım gələrsə, “Dağlıq Qarabağ” podratçıların işə götürülməsini yerindəcə təşkil edir.
Zəruri qeyd: Qarabağda yerləşdirilən erməni əhalisinin sayı 27 min nəfərdir. Belə çıxır ki, “müdafiə ordusu” dedikləri qanunsuz silahlıların sayı 270-dən çox ola bilməz. Əks halda orda terrorçuların da məskunlaşdığı demək olacaq.