10 iyul tarixində spirtli içki qəbul etmədiyim halda Lənkəran Şəhər Yol Patrul Xidməti inspektoru Mahir Şakir oğlu Məmmədli tərəfindən saxlanıldım.
Bunu AzerTimes-a şikayətində Rusiya vətəndaşı Əliabas Ağayev deyib.
O bildirib ki, onu təhlükəsizlik kəmərindən istifadə etmədiyi üçün saxlayaraq 329.1 (təhlükəsizlik kəmərini bağlamadan nəqliyyat vasitəsini idarə etmə) maddəsinə uyğun 40 manat cərimə ediblər.
Şikayətçi polisin tələbi ilə saat 12:40 radələrində dispanserdə yoxlandığını bildirib:
“Yuxusuz olduğum üçün gözlərim qızarmışdı. Məndən içkili olduğumu soruşduqda, 1 gün əvvəl spirtsiz pivə içdiyimi bildirdim. Dərhal məni dispanserə apardılar. Lakin əvvəl özləri daxil olub həkimlə nə danışdılarsa, sonra məni dəvət etdilər. Mən də əmin idim ki, içki içmədiyim üçün cihaz alkoqol göstərməyəcək. Amma yanılmışam. İçki içmədiyim halda sərxoş olduğum bildirildi.
Daha sonra məni şöbəyə gətirərək 333.1 (Nəqliyyat vasitəsini idarə etmək hüququ olan şəxs tərəfindən nəqliyyat vasitəsini alkoqoldan, narkotik vasitələrdən, psixotrop maddələrdən və ya güclü təsir göstərən digər maddələrdən istifadə olunması nəticəsində sərxoş vəziyyətdə idarə edilməsi) maddəsi ilə təqsirləndirərək 400 manat cərimə yazdılar.
Oradan çıxdıqdan dərhal sonra yenidən narkoloji dispanserə qayıtdım. İçkili olmadığımı bildirərək təkrar yoxlamalarını tələb etdim. Həkim əvvəl razılaşmasa da, nəhayət razı oldu. Yoxlamadan sonra bu dəfə də həkim içkili olmadığım haqda arayış təqdim etdi”, – A.Əliabas deyib.
Şikayətçinin iddiasına görə, dispanserdə polisin təlimatı ilə onu fərqli cihazla yoxlayıblar.