Xəbər - Ləman Zeynalova – Trend:
Azərbaycan qazının Bolqarıstana nəqlini nəzərdə tutan Yunanıstan-Bolqarıstan interkonnektorunun (IGB) tikintisini həyata keçirən ICGB AD şirkəti qaz kəmərinin marşrutu boyunca infrastrukturun sınaqlarına başlayıb.
Bu barədə Trend-ə şirkətdən bildiriblər.
Qeyd olunub ki, interkonnektorun tikintisi ilə bağlı bütün əsas işlər fəal şəkildə davam edir: “Oktyabrın ikinci yarısında Yunanıstan ərazisində infrastrukturun hidrosınaqları başlayıb. Tezliklə, bu prosesin IGB-nin Bolqarıstan ərazisindəki marşrutu üzrə başlanması gözlənilir”.
Şirkətdən onu da bildiriblər ki, hidrosınaqlar qaz kəməri sınaqlarının ən vacib mərhələlərindən biridir. Bu prosedur infrastrukturun layihələndirmə zamanı müəyyən edilən parametrlərə uyğun olub-olmamasını yoxlamağa imkan verir.
Qeyd edək ki, IGB layihəsi “Şahdəniz 2” yatağından hasil olunan Azərbaycan qazının Bolqarıstana nəqlini nəzərdə tutur. Layihənin ilkin buraxılış gücü ildə 3 milyard kubmetr təşkil edəcək. Gələcəkdə bu göstəricinin ildə 5 milyard kubmetrədək artırılması planlaşdırılır.