Bakıda keçirilən bədii gimnastika üzrə FIG Dünya Kubokunun
ikinci yarış günü çərçivəsində azərbaycanlı idmançılar Arzu
Cəlilova və Zöhrə Ağamirova gürzlərlə çıxışdan ibarət proqramı
yerinə yetiriblər.
Trend xəbər
verir ki, gürzlərlə çıxışına görə münsiflər Arzu Cəlilovaya 26.650
xal verib və o, hazırda 17-ci aralıq yeri tutur. Zöhrə Ağamirova
30.400 bal toplayaraq beşinci aralıq pillədə qərarlaşıb.
Arzu Cəlilovanın çoxnövçülükdə (halqa, top, lent və gürzlə)
göstərdiyi nəticə 119,450 xal olub və hazırda o bu göstərici ilə
altıncı yerdədir.
Zöhrə Ağamirovanın dörd proqram üzrə 119.300 bal toplayıb və bu,
yeddinci nəticədir.
Qeyd edək ki, aprelin 22-dən 24-dək Bakıda Bədii Gimnastika üzrə
Dünya kuboku keçirilir.
Azərbaycanın gimnastika növləri üzrə bu il ev sahibliyi etdiyi
5-ci beynəlxalq yarışda 31 ölkədən 42-si fərdi və 84-ü qrup
komandasının (14 qrup) üzvü olmaqla 126 gimnast iştirak edir.
Yarışda ölkəmizi fərdi növdə Arzu Cəlilova və Zöhrə Ağamirova,
eləcə də Güllü Ağalarzadə, Ləman Əlimuradova, Kamilla Əliyeva,
Zeynəb Hümmətova, Yelizaveta Luzan, Darya Sorokinadan ibarət qrup
hərəkətləri üzrə komanda təmsil edir.
3 gün ərzində gimnastlar ayrı-ayrı alətlər və çoxnövçülük üzrə
mübarizə aparacaqlar.
Ənənəyə uyğun olaraq, bu kubokda da ən çox icra xalını yığmış
gimnast və qrup komandasına ənənəvi “AGF Trophy” Kuboku da təqdim
olunacaq.
Qeyd edək ki, bu, ölkəmizdə keçirilən bədii gimnastika üzrə 9-cu
Dünya kuboku yarışıdır. Xatırladaq ki, paytaxtımız 2005 və 2019-cu
illərdə bu növ üzrə dünya çempionatına və 8 Dünya kubokuna ev
sahibliyi edib.