Amerikanın təhlükəsizlik və kəşfiyyat orqanları var. Əhməd bəy özü də koma halında deyil. Danışır, məlumat verir. Hətta deyib ki, 6 nəfər idi və onları tanıyır.
Bu sözləri AzerTimes-a ABŞ-da yaşayan Güney Azərbaycan Milli Oyanış Hərəkatının (GAMOH) rəhbəri Mahmudəli Çöhrəqanlı Günaz TV-nin rəhbəri Əhməd Obalının vəhşicəsinə döyülməsinə münasibət bildirərkən deyib.
O, bu hadisədə terror izi olmadığını bildirib:
“Əgər terror aktı olarsa, Amerika dövləti, gizli servisi lazım olan raporu verəcək. Əgər açıqlamasalar, demək, adi savaş və toqquşma olub. Əhməd bəyin restoranı var. Müştərilər bəzən problem yaradır. Hadisə bu səbəbdən də ola bilər. Bunların hamısı ehtimaldır. Amma çox üzüldük və keçmiş olsun deyirik”.
M.Çöhrəqanlı İran hökuməti tərəfindən Amerikada yaşayan milli fəallara, həmçinin ona qarşı belə bir təhlükənin ola biləcəyini düşünmədiyini bildirib:
“Hiss edirəm ki, Amerikanın təhlükəsizlik orqanlarının nəzarəti altındayıq. Bizi qoruyur. 20 ildir buradayam, mənə qarşı bir hadisə və ixtilaf olmayıb. Ümid edirəm ki, bundan sonra da olmayaacq. Olsa da olsun. Azərbaycan televizyalarından birinə demişdim ki, bu fars-molla rejimi bizim maddi-mənəvi varlığımızı məhv etməkdədir. Biz ölməliyik ki, milli varlığımız ölməsin. Biz can və qan verməliyik ki, Azərbaycanımız yaşasın”.
Qeyd edək ki, ABŞ-da mühacir həyatı yaşayan Əhməd Obalı 6 nəfərin hücumuna məruz qalıb və şiddətli şəkildə döyülüb. Ona İran xüsusi xidmət orqanları tərəfindən sui-qəsd edildiyi də istisna deyil.