İslandiya ərazisində dünyada ilk dəfə olaraq malların dronlar vasitəsilə ünvanlara çatdırılması xidməti fəaliyyətə başlayıb.
Layihənin müəllifləri İslandiyanın AHA xidmət mərkəzi və İsrailin “Flytrex” şirkətidir.
Dronla məhsulların çatdırılması imkanları barədə çoxdan danışılır, ancaq ilk dəfə bu cür xidmət tam olaraq məhz Reykyavikdə istifadəyə verilib. Şəhərin problemi ondadır ki, dəniz sahilindəki buxtada yerləşir, həmçinin, ərazisindən çaylar keçir. Bu səbəbdən yerüstü nəqliyyat vasitəsilə məhsulların çatdırılması çətinlik yaradır. Artıq pilotsuz uçuş aparatları ilə çatdırılma layihəsinin müəllifləri bir neçə sınaq uçuşu həyata keçiriblər.
İlkin mərhələdə AHA və “Flytrex” gündəlik olaraq 20-yə yaxın çatdırılma həyata keçirmək və eyni anda bir neçə istiqamətdə dronları uçuşa buraxmaq niyyətindədirlər. Xidmət tam olaraq ilin sonuna qədər işə salınacaq, sifariş olunan məhsullar birbaşa evə çatdırılacaq. Pilotsuz uçan aparat eniş etməyəcək və məhsulları kəndirlə yerə endirəcək.