Xəbər - Elçin Mehdiyev – Trend:
“Əlilliyi olan şəxslərin hüquqları haqqında” qanuna təklif olunan dəyişikliklərlə bağlı qanun layihəsi Milli Məclisin plenar iclasına tövsiyə edilib.
Bunu AzerTimes-a Milli Məclisin Əmək və sosial siyasət komitəsinin sədri Musa Quliyev deyib.
Onun sözlərinə görə, əlillik dərəcəsinin təyin edilməsi ilə əlaqədar yeni qaydalara keçilir. O qeyd edib ki, bununla bağlı “Əlilliyi olan şəxslərin hüquqları haqqında” qanuna dəyişikliklər təklif edilir.
M.Quliyev bildirib ki, artıq I, II və III qrup kimi əlillik göstəricisi olmayacaq: “Əlillik dərəcəsi orqanizmin funksiyasının itirmə dərəcəsinə görə, yəni faizlə müəyyən ediləcək. Orqanizmin funksiyasının 30-60 faiz itirilməsi III qrup, 60-80 faiz itirilməsi II qrup, 80-100 faiz itirilməsi isə I qrup hesab olunacaq”.
Komitə sədri vurğulayıb ki, qanuna dəyişiklik bu gün komitə iclasında müzakirə edilərək Milli Məclisin plenar iclasına tövsiyə edilib: “Əgər qanuna dəyişikliklər qəbul olunsa, yeni qaydalar 2022-ci ilin yanvarın 1-dən qüvvəyə minəcək”.