Ceyhun Bayramov və ABŞ-ın Oklahoma Ştatının qubernatoru arasında görüş olub (FOTO)

27 iyul 2021-ci il tarixində xarici işlər naziri Ceyhun Bayramov ABŞ-ın Oklahoma Ştatının Qubernatoru Kevin Stitin başçılıq etdiyi nümayəndə heyətini qəbul edib.

Xarici İşlər Nazirliyindən AzerTimes-a verilən məlumata görə, nazir Ceyhun Bayramov Oklahoma Qubernatorunu səmimiyyətlə salamlayaraq, Azərbaycanın ABŞ arasındakı qarşılıqlı faydalı əməkdaşlıqdan bəhs edib. ABŞ-ın bu günədək Azərbaycanın təşəbbüskarı və iştirakçısı olduğu başlıca layihələri, o cümlədən enerji layihələrini dəstəklədiyini qeyd edən nazir, ölkəmizin sülhməramlı əməliyyatlarda iştirakı, tərəflər arasında sərhəd təhlükəsizliyi, humanitar sahələrdə və s. əməkdaşlıq barədə məmnunluqla danışıb.

Oklahoma Qubernatoru Kevin Stit Azərbaycana səfərindən məmnunluq ifadə edib. O, Azərbaycan Respublikası Prezidenti ilə çox yaxşı görüşün keçirildiyini qeyd edib. Səfər çərçivəsində rəsmi görüşlərlə yanaşı, bölgələrə də getmək fürsətinin olacağını bildirən Qubernator Kevin Stit, habelə konkret sahələrdə əməkdaşlıq, investisiya perspektivlərini də nəzərdən keçirmək imkanını qeyd edib.

Görüş zamanı nazir Ceyhun Bayramov qarşı tərəfə Ermənistanın Azərbaycana qarşı təcavüzkar siyasətinin tarixi, beynəlxalq ictimaiyyətin bu xüsusda mövqeyi, 10 noyabr 2020-ci il üçtərəfli bəyanatının imzalanmasından sonra bölgədə mövcud olan vəziyyət, işğaldan azad olunmuş ərazilərdəki dağıntıların miqyası, mina təhlükəsi, sərhəd məntəqəsində gərginliyin səbəbləri, azad olunmuş ərazilərdə həyata keçirilən bərpa və yenidən quruculuq işləri barədə ətraflı məlumat verib.

Qarşı tərəfə, həmçinin bölgədə mövcud olan yeni reallıqlar şəraitində Azərbaycan və ABŞ arasında o cümlədən, kənd təsərrüfatı, mədən sənayesi, turizm, alternativ enerji və s. sahələrdə əməkdaşlıq imkanları barədə məlumat təqdim edilib.

Görüşdə habelə qarşılıqlı maraq doğuran digər məsələlər ətrafında fikir mübadiləsi aparılıb.

Teqlər: