Xəbər - Elçin Mehdiyev – Trend:
AXC-nin xəyanəti ilə Ermənistan tərəfindən işğal edilmiş torpaqlarımız Prezident İlham Əliyevin düzgün siyasəti nəticəsində azad edildi, ölkəmizin ərazi bütövlüyü təmin olundu.
Bunu AzerTimes-a Milli Məclisin deputatı Cavid Osmanov deyib.
Deputat bildirib ki, Azərbaycan, Rusiya prezidentləri və Ermənistanın baş naziri tərəfindən 10 noyabrda imzalanmış bəyanat Azərbaycanın tam qələbəsi, Ermənistanın isə kapitulyasiyası demək idi.
C.Osmanov qeyd edib ki, o zaman AXC hakimiyyətinin xəyanəti, ölkədə yaratdıqları qarşıdurma, anarxiya, xaos torpaqlarımızın işğalına gətirib çıxardı:
“AXC-nin qeyri-qanuni yolla hakimiyyəti zəbt etməsi, xalqımıza xəyanəti, xarici dairələrə xidmət etmək kimi amalları və öz ciblərini doldurmaq istiqamətində atdıqları addımlar erməni vandalları üçün səmərəli şərait yaratdı və onlar da bundan çox yaxşı istifadə etməklə torpaqlarımızı işğal etdilər.
Xalqımıza qarşı xəyanət yolu tutan səriştəsiz AXC hakimiyyətinin üzvlərinin, xüsusən də o zamankı dövlət katibi, parlament sədri, müdafiə naziri, daxili işlər nazirinin xalqın maraqlarına uyğun gəlməyən mövqe tutması, xəyanət etmələri torpaqlarımızın işğal altına düşməsinə səbəb oldu. Çünki onların xəyanəti, ölkədə yaratdıqları xaotik vəziyyət, qarşıdurma, eyni zamanda qohumbazlıqları, ətraflarındakı səriştəsiz, idarçilik qabiliyyəti olmayan insanları müxtəlif vəzifələrə gətirmələri nəticəsində ölkəmizin 20 faiz torpağı işğal altına düşdü”.
Deputat vurğulayıb ki, 1993-cü ildə ulu öndər Heydər Əliyev hakimiyyətə gəlməsəydi, Azərbaycan daha böyük bəlalarla üzləşə bilərdi və daha çox torpağımız erməni işğalı altına düşə bilərdi:
“90-cı illərin AXC-Müsavat cütlüyünün tör-tökünüləri bu gün də antimilli şura ətrafında, AXCP ətrafında birləşərək yenə də öz xəyanətlərini davam etdirirlər. Lakin bu gün çox sevinirik ki, ölkə Prezidenti, müzəffər Ali Baş Komandanımız cənab İlham Əliyevin rəhbərliyi altında rəşadətli ordumuzun döyüş meydanında şücaəti, Prezidentimizin diplomatiya və informasiya müharibəsi sahəsində uğurlu siyasəti nəticəsində torpaqlarımız işğaldan azad edildi və ərazi bütövlüyümüz təmin edildi. O zaman AXC-nin xəyanəti nəticəsində işğal edilmiş torpaqlarımız bu gün cənab Prezidentimizin apardığı düzgün siyasət nəticəsində azad edildi”.